(أوعي تسألي) خواطر....(أشرف الدغيدي)
ولسه عن حبي بتسألي
مين يعني اللي دايماً مسهرني
مين سارق النوم من عيني
مين هي اللي فهواها مدوباني
صدقيني غيرك انتي مفيش
وعن حبي وغرامي متسأليش
انتي الوحيده اللي روحي فيها ووخداني
وعيونك ورموشها مدوخاني
ونار شفايفك مجنناني
وللغرام ليل ونهار ندهاني
وكحلة عيونك ياحبيبتي ورسمتها
بحر ملوش حدود ولا شطئآن ومغرقاني
ولسه ياحبيبتي بتسأليني
وانتي قلبي بينبض بحبك وهواكي
انتي فاكره إن قلبي زي باقي القلوب
لا ياحبيبتي قلبي فالحب والغرام مالو وجود
مش زي القلوب نبضه دم داخل ودم خارج
نبض قلبي حب داخل وعشق وخارج وغرام ليل ونهار
حتي شراييني مليانه بالعشق والهوي والحب والغرام بيجروا دون انقطاع
حتي الهوا اللي بتنفسه ياحبيبتي منك
وأنفاسي باستنشقها من هوا زفيرك
اوعي تاني عن حبك تسأليني
ولو سألتي تبقي عاوزه تجرحيني
لان حبك كل حاجه حلوه فحياتي
ونفسي ايدك تدفي علي طول ايدي وتفضل ليل ونهار ايدي مسكاكي
إنتي الحب اللي عايش عشانه وانتي اتخلقتي عشاني
انتي جوعي وعطشي وانتي طعامي وشرابي
اه ياحبيبتي لو كنتي بس تعرفي
حبي ليكي فاق وصف وخيال حروفي
حب ملوش وجود بين البشر
حب اكتر من أي عاشقين جمعهم القدر
دانتي حبك وعشقك فاق عندي حد الجنون
نساني حتي نوم العيون والجفون
دا أنا ياحبيبتي حتي بخاف انام
واتحرم من نظرتي ليكي ولو لحظات
حتي وانتي نايمه جنبي ببقي بيكي فرحان
عيني وقلبي بيكونوا فرحانين بيكي وانا جنبك سهران
انتي ياحبيبتي الحب كله والحنان
اسقيني منه وارويني قد ماتقدري
هي ثواني وبارجع تاني عطشان
الله علي حبك ياحبيبتي حتي ولو كان
لاقبله ولا بعده حب كان ولو من زمان
مين روميو وقيس وعنتر اللي بيحكو عنهم لغاية الآن
ييجوا يتعلموا مننا معني الحب والغرام والحنان
هما بس كانوا من حسن حظهم
اتخلقوا في زمن مفيهوش زينا عشاق
تعالي ياحبيبتي ضميني و أحضنيني
وخليني ادوب جواكي وقلبي يرتاح
دا نتي لو بعدتي عني ثواني
بحس برعشة فجسمي كله واحس إنه
مليان الم وجراح
ياللي ملكتي القلب والفؤاد وحسنك ودلالك فاق الوصف و الخيال
ياواخده عقلي وكياني وسارقه الفكر والبال
خواطر....(أشرف الدغيدي)
حقوق الطبع والنشر محفوظه
ليست هناك تعليقات:
إرسال تعليق